你想Dream Home：成功男士一定要有樓？

一句「無樓唔好白撞」去年引起不少話題，男人有樓便等於成功人士嗎？有後生仔坦言，「好多女仔覺得要搵有樓有車的男人」，亦有男孩認為「有樓好啲，但非必要條件」及「不用苛求」。

現時樓價高得嚇人，有人則認為有自信就是無敵。大部分人認為成功男人要有穩定事業及可以養活家庭，女孩子多認為男人要有「上進心」及「有目標」，部分人則着重品格，希望男人表現得更「成熟」。

今期「你想Dream Home」走訪九龍灣，睇睇後生仔女對「有樓就是成功」的看法！記得要睇片呀！

─ ─ ─ ─ ─ ─
●喺女仔眼中，男士點先算成功？

要識照顧人
Suey：「夠成熟，可以照顧女性及家人，高薪並非主要條件。」

收入夠穩定
Amy：「有穩定的工作及收入，能夠養活家人，並且有目標及事業心。」

有良好人格
Nicole：「成功不在於擁有物質，而是擁有良好的人格及成熟的待人處事方法，不認為男人有樓便是成功。」

靠自己上車
Crystal：「能夠養活自己及家人，月入至少要有2至3萬元，要靠自己實幹上車的才叫成功男士。」

─ ─ ─ ─ ─ ─
不過，講到尾，擁有「屋仔」是不少男士或女士畢生願望，但樓價攀升，造就細單位需求殷切，尤其市區鐵路沿線上車盤備受追捧。要上車做「有樓男」其實也不是完全冇計。

鄰近港鐵九龍灣站的得寶花園，近月迷你戶呎價亦錄破頂成交。現時屋苑入場費由430萬元起，較德福花園及淘大花園平，如承做八成按揭、還款期30年計算，首期86萬元，每月供款12,975元。

九龍灣交通方便，對追求生活便利的年輕人而言是置業之選，而港鐵九龍灣站附近有三個大型私人屋苑，以離港鐵站約五分鐘步程的得寶花園樓價最平，深受年輕人追捧。

屋苑樓齡34年，8座大廈提供逾2,000伙，提供二、三百方呎的一房及兩房單位。基座商場近年改頭換面，打造以懷舊為主題的小食店，是年輕人Selfie及搵食新蒲點。樓下牛頭角道亦有多條巴士路線供選擇。

美聯助理區域經理黃遠基表示，得寶花園低層單位，屬一房間隔，實用面積253方呎，叫價430萬元，屬區內最平的大型私人屋苑放盤，實用呎價16,996元。屋苑規模僅次於德福花園及淘大花園，而兩個屋苑入場費分別由630萬元及498萬元起。